NEWYDDION

Mae Ymddiried yn elusen gofrestredig a sefydlwyd i hyrwyddo a hwyluso mynediad i weithgaredd addysgol a datblygol yn y diwydiannau creadigol: teledu, ffilm, radio a gwasanaethau digidol. Ei nod yw ymestyn a chyfoethogi ystod sgiliau a phrofiad pobl sy'n gweithio'n broffesiynol yn y cyfryngau er budd gwylwyr, gwrandawyr a defnyddwyr yng Nghymru.

Hyd yma derbyniodd nifer o unigolion grant gan Ymddiried, yn amrywio o £200 i £6,000, a'u galluogodd i fynychu cyrsiau penodol, cynlluniau hyfforddi, cynhadleddau a gwyliau er mwyn ymestyn eu profiad addysgol a phroffesiynol. Dyfernir y grantiau ddwy waith y flwyddyn.

Eleni, penderfynwyd ar gynnig ysgoloriaeth swmpus newydd, yn ychwanegol i'r grantiau arferol, er mwyn gallu cyfrannu at ddatblygiad proffesiynol unigolyn sydd yn dyheu i ddilyn gyrfa a gwireddu uchelgais. Gan gynnig swm ariannol sylweddol, y bwriad yw ysgogi a hybu person i fanteisio ar gyfle penigamp ac unigryw i wneud cyfraniad sylweddol i'r diwylliant a'r diwydiant cyfryngol.

Manylion

Ymgeisio

Bydd yr ymgeisydd llwyddiannus yn berson uchelgeisiol ac ymroddgar sydd yn barod wedi cychwyn ei g/yrfa yn y diwydiannau creadigol. Bydd angen profi deallusrwydd, dyfalbarhad ac afiaith am ddilyn trywydd newydd arbennig.

Ystyrir ceisiadau i ddatblygu gyrfa mewn teledu, ffilm, radio a gwasanaethau digidol: byddai modd hefyd ystyried cynlluniau hyfforddiant ar draws y meysydd hyn er mwyn adlewyrchu datblygiadau aml-blatfform.

Gallwn ystyried cefnogi dilyniant gyrfa artistig, gyrfa rheolaeth/busnes creadigol neu cyfuniad o'r ddau.

Mae'n ofynnol fod yr ymgeisydd wedi byw yng Nghymru am o leiaf bum mlynedd.

Cyfanswm y grant

Bydd hyd at £30,000 ar gael i'w wario dros dair mlynedd ar weithgaredd penodol. Bydd y cyfanswm a roddir yn ddibynnol ar y cais ariannu a gyflwynir - gweler y canllawiau ymgeisio isod.

Bydd cynllun ariannu yn cael ei gytuno gyda'r ymgeisydd llwyddiannus ar gychwyn cyfnod yr ysgoloriaeth. Cynhelir adolygiad blynyddol o'r cynllun hyfforddiant ac asesiad o ddatblygiad yr ymgeisydd.

Astudiaethau / hyfforddiant cymwys

- cwrs galwedigaethol lefel uwch

- doethuriaeth mewn pwnc yn gysylltiedig a'r diwydiannau creadigol

- swydd preswyl

- profiad gwaith estyngedig o fewn cwmni neu sefydliad cydnabyddedig

- cynllun hyfforddiant mewnol gyda chwmni neu sefydliad cydnabyddedig

Gellir defnyddio'r arian i ariannu cyfuniad o'r uchod os yw'n amlwg fod dilyniant clir a phwrpasol i ddatblygiad personol a phroffesiynol yr ymgeisydd.

Byddem yn croesawu cynlluniau datblygu personol sydd yn ystyried mathau gwahanol o hyfforddiant ac nid o reidrwydd yn dilyn y patrwm ffurfiol o gyrsiau hyfforddiant, e.e gellid defnyddio'r arian i alluogi'r unigolyn i gael ei r/hyddau o waith/swydd os yw'r amcanion datblygiad proffesiynol yn glir.

Nid oes rhaid i'r gweithgaredd/hyfforddiant/cwrs gael ei leoli yng Nghymru,

Bydd Ymddiried yn cefnogi'r ymgeisydd llwyddiannus trwy benodi mentor personol dros y cyfnod penodedig.